باران

وەکوو هەورێ کە باران ها بە کۆڵی
لە ئاسۆی چاوەکانت دا نوقم بووم
دڵۆپێک بووم لە دوی دەریا دەوسوڕام
بە تیرێژی نیگاهت دابوو هەڵچووم

ده‌گە‌ڵ ده‌ریا دڵم کردۆتە یه‌ک لا
شه‌پۆلی خۆشه‌ویستی بۆیه ده‌مبا
له‌سیله‌ی چاوی ده‌ریا ماسی زانی 
دڵی ده‌ریا نە‌بێ ناگا‌تە دەریا

به‌ره‌و تۆ دێمه‌وە له‌م شاره دوره
وڵاتی خۆشه‌ویستی بێ سنوره
به‌باوە‌ش مانگ وئه‌ستێران ده‌هێنم
هه‌تاوم پێیە چاوم پڕ له‌نووره

دەتوانم ئاسمانیش دەستەمۆ کەم
بە چاواندا شەپۆل دەم شین و ڕۆ کەم
دەتوانم ئاگرێک بەردەم لە دنیا
لە دووتا ببمە دووکەڵ ڕو لە سۆ کەم

وەکوو باران دەتوانی دابباری
ئەگەر شین بومەوە بمکەی بە دیاری
دەتوانن چاوەکانت هەر لە دوم بن
نەکا ون بم لە ڕێگەی نادیاری

ئەنوەر خاتەمی